短炒倉：第一太平 有數得計

尋日恒指雖然收市由跌變升，但股場大屠殺嘅慘烈程度，就真係同電影《雷霆救兵》開場嗰幕諾曼第搶灘戰有得揮，大批二三線股中彈倒地，跌幅逾一成嘅比比皆是。事實到今日為止，今年環球主要股市幾乎全部見紅，道指累跌6%，內地A股跌一成、港股更跌15%，仍然有得升嘅股市寥寥可數，而表現最好嘅頭三位，依次係印尼、泰國同菲律賓股市，均錄得逾3%升幅。

講到本地具東南亞概念嘅股份，自然令人諗起第一太平（00142），事關集團盈利全部來自菲律賓同印尼兩地，涵蓋行業包括電訊、食品、基建及天然資源等等，可全面受惠當地經濟發展。集團下周一（二十九日）先至公布中期業績，但旗下幾家主要附屬公司嘅中期業績都經已曝光，有數得計。其中佔近半收益來源嘅PLDT半年盈利雖微跌1.75%至213億菲律賓披索，但MPIC中期就多賺11.6%至19.57億披索，而Indoagri更錄得79%增長，至1.29兆印尼盾，一來一回，相信嚟緊呢份中期業績應該穩中有升，何況印尼盾同菲律賓披索今年以來兌美元均升值約6%，亦可為一太業績帶來額外助力。

一太昨收報7.03元，現價往績市盈率8.6倍，股價近月在6.6元水平屢見支持，前高位則為7.94元，不妨伺機於低位收集。

第一太平（00142）

阻力位：7.94元

支持位：6.60元