Fundman睇市：華潤電力不宜賤價求售

周一，港股走勢認真夠誇張，期指一日之內，經歷高開，挾高，倒跌，再倒升，來來回回接近千六點步程，無論睇好睇淡，肯定有五內翻騰，來回天堂與地獄的感覺，而揸咗股票嘅，睇住大利市機血壓隨時都要高幾度。

上星期五，其實美股跌幅同亞洲市美股場外期貨差距唔大，尋日整個亞洲市場大冧檔，主要同周末幾間大行嘅策略師，不約而同釋放負能量有關，佢哋建議投資者對今個星期五伯南克Jackson Hole會議唔好抱太大期望，認為QE3出台機會渺茫，美銀美林更估嚟緊一年美國衰退機會升至四成。

推QE3注定失敗

其實唔使大行賓架出報告，都知賭QE3出台都係注定九死一生，雖然被標準普爾剔除AAA債務評級，但美國十年期債息屢創新低，上星期去到2.11厘，大家不期然會諗，聯儲局即使入市買債，債息又可以再跌幾多？與其倒錢落海，不如留番彈藥進行其他更具創意措施好過。既然市場今日欠嘅係信心唔係鈔票，史提芬認為伯南克不如學白頭任年代嘅金管局咁，入市買股票恢復市場信心，甚至政府入市購入遭當地銀行收回強制拍賣的「吉屋」，減低空置率，都會比推QE3有更大振奮作用。

講番股市，尋日港股最兇險時刻，係午前傳有長倉基金（Long only）因為贖回壓力，大手沽出近期仲跑贏大市的基金股，令到水泥、濠賭、內需股等幾乎無一幸免，閒閒地跌幅一成以上。水泥股跌到一仆一碌，龍頭股安徽海螺（00914）尋日最低見過27.25元，跌穿被視為牛熊分界的250日線，與七月高位41元相比，股價得番三分之二。市場明顯將焦點集中在中央政策，以及暑假傳統水泥淡季的負面消息上。睇番海螺一一年市盈率去到七倍左右，保障房長期政策不變，水泥價格可望於第四季回升，30元樓下應該係另一次撈底好時機。

近期唔少股份業績後見光死，華潤電力（00836）中午出業績，午後股價好似山泥傾瀉一樣，跌0.8元，收報12.9元，跌幅5.8%，加埋同系潤地（01109）以及中國海外（00688），係表現最差嘅三隻藍籌。

估值更遜金融海嘯

潤電上半年營業額升37%至290億元，純利微升1%至24.84億，相對中期純利大跌四成一嘅華能（00902），其實已經跑贏一條街，無奈市場氣氛唔就，弱勢板塊中的強者，又怎能幸免？

早前潤電公布七月售電量數字，按年升13.6%，累積七個月計則升22.3%，符合市場預期。睇番潤電○九年美國金融海嘯最惡劣期間，估值最低見過12.8倍，之後反彈到22倍見頂，現時一一年市盈率去到10.7倍，仲衰過兩年幾前，市場今日唔單止怕美國經濟衰退，仲擔心中國出口製造業放緩，影響電力需求。基於12.4元是今年起步位，13元樓下入貨，筆者唔認為有太大風險，低速增長業績，可能困擾股價多一兩日，但目前肯定不是賤價求售的時間，有耐性作兩至三年持貨的，刻下會是一個機會。