股海實戰：思捷環球暫時博唔過

港股尋日好似失控，恒指高開65點後，憑着中移（00941）同大笨象（00005）衝上高位19,666點後掉頭回落，未到中午已倒跌，勢估唔到三點過後歐洲開市早段靠穩，恒指掉頭挾高，結果收市倒升86點，報19,486點，成交884億元。不過，睇見大市沽空比率逾一成，且強勢股紛變落水狗，單靠托住幾隻藍籌造就嘅恒指高收場面，實在難以叫心灰意冷嘅缸邊友回心轉意！

早前股價迭創新高嘅金飾股，尋日上晝早段尚無異樣，但十點半過後就如倒水般狂插，即使恒指倒升亦難力挽狂瀾，六福（00590）、周生生（00116）、英皇鐘錶（00887）及東表（00398）跌幅介乎9.8至12.6%，真係好睇過戲！

同樣咁「好睇」嘅有水泥股，兩隻龍頭股海螺（00914）、中建材（03323）一度跌逾一成，但尾市有買盤掃上，收市分別僅跌3.5及4.3%。不過，唔係隻隻都係「犀利哥」，山水水泥（00691）同中材（01893）收市分別跌10.9及11.4%。可見，基金決心整頓持倉，即使保留部分國策板塊，亦只會留住流通性較高嘅龍頭股，其他靠邊站嘅更加難有運行！

唔經唔覺，昔日基金至愛嘅國際零售股——思捷環球（00330），如今股價得番廿蚊雞，真係令人好唏噓！上周有外電報道，指思捷擬出售美國及加拿大業務，更委託紐約投資銀行處理出售事宜，曾接觸數家私募基金公司。

歐、美本來係思捷業務嘅大本營，但如今兩個市場前景都十分之暗淡，早前思捷向華創（00291）購入內地合營股權至全資擁有，諗住靠內地業務增長平衡吓歐、美市場風險，但始終猛虎不及地頭蟲，內地業務發展緩慢，而歐、美業務又唔識止跌，亦見唔到底。

出售業務作用有限

截至今年三月底止九個月，美、加業務僅佔集團業額3.5%，歐洲才佔最大比重，達79%，故即使成功出售美、加業務，可起嘅「止血」作用不大，對於刺激股價嘅作用亦唔多。之不過，繼退出挪威及葡萄牙市場，並喺全球關閉三十多家（其中七間喺北美）虧損店舖後，若然今次真係沽出美、加業務，唔多唔少反映管理層決心壯士斷臂，為業務去蕪存菁，方向係可取，只係單憑止蝕不足以挽回投資者信心，如何開源，才是重點。喺成功重建增長基礎前，股價更低，都只係適宜遠觀。