樓市出更:老手近5億貨測市
港股同樓市最近表現麻麻,不過高質素單位個價仍然企得好穩,投資者趁機出貨試吓市場「水溫」,亦可以換貨重整物業組合;其中永光地產大股東譚逢敬(永光譚)同資深投資者吳鎮科(阿爺)等持有嘅灣仔會景閣高層全層,趁機以要約形式放售,意向價近3.5億元。
永光譚持有嘅跑馬地永光苑高層同頂層,亦委代理放售,意向價超過1.15億元。
會景閣全層要約式放盤
第一太平戴維斯老友同劉Sir講,話佢哋公司最近接到兩單大生意,其中上述灣仔會景閣高層全層以要約形式放售,總樓面大約21,180方呎,意向呎價約1.65萬元,計落都差唔多3.5億元,截止日期係下月二十八日。
依家個市「立立亂」,邊位咁勇放售全層靚貨,劉Sir喺好奇心驅使下就透過互聯網查探單位背景,土地註冊處資料顯示,原來呢個單位由永達國際投資於○八年二月以2.118億元購入,而公司註冊處顯示,呢間公司董事正正係永光譚同阿爺。
永光苑意向呎價3萬
呢位老友仲爆料,永光地產仲向佢哋委託獨家代理出售跑馬地永光苑餘下單位,包括高層全層示範單位同埋頂層連天台特色戶。其中面積約1,756方呎高層全層示範單位,連同全新時尚裝修,仲係項目唯一一個連家具單位;至於面積2,096方呎頂層戶,更設有約906方呎私人空中花園。
佢仲透露兩個永光苑單位意向呎價均約3萬元,計番都要約5,268萬同6,288萬元。劉Sir心諗,連同上述會景閣全層放盤,真係件件都係頂級貨唔靚唔放喎,幾個單位加埋要成4.65億元,所以話豪宅嘅抗跌力真係唔係講笑。
灣仔會景閣有單位以要約形式放盤。