市場徐想：有升有息股民最Like
對於散戶來講，每年呢個時候，都希望上市公司喺出業績嘅時候慷慨「送禮」。唔少股份公布派息理想，如特步（01368）及勝獅（00716）等，股價都因此顯著上升，價息齊賺！
早前財險（02328）盈利按年升近97%，並四年以來首次恢復派息，且派息比率又高於同業，為市場帶來驚喜。正如我所講，投資股票係投資喺佢哋嘅資產增值同派息率，有得派當然開心，但係穩定性同樣重要，唔派息留低嘅現金有無實際發展方向，都係大家要考慮嘅一環。
至於另一批股份，就係唔派息嘅股份，好似茂業（00848）中期純利3.01億元人民幣，升5.17%，都算有錢賺。不過，由於出乎意料地唔派中期息，令股價周二急挫逾8%。茂業董事長兼首席執行官黃茂如解釋，係希望留資金作擴展之用，公司並無資金壓力。不過基金大戶如果係以收高息作為揸股份嘅目標，而股份唔能夠幫佢哋「達標」兼攞獎金，唔掟貨至奇。