短炒倉:新創建息高可取

即使祖國再度送禮,但對勢弱嘅港股,未能帶來支持作用,加上傳內地有機會加息,令恒指尋日一度跌穿20,000點水平,收市叫做勉強守住,但後市仍然難言樂觀。咁嘅環境之下,即使唔係離場觀望,選股方面亦都應該偏向穩陣為主。

新創建(00659)業務一直頗為多元化,遍及交通、物流、基建、建築、水務及電力等等,從負面角度睇係業務唔得集中,難以惹起芬佬興趣,不過好處就係分散風險,皆因就算環境幾曳,總有一兩項業務有表現,故公司歷年業績及派息,表現均相當平穩。

業務發展趨積極

不過,集團近期發展亦見轉趨積極,繼分拆從事鐵礦石業務嘅新礦資源(01231)上市後,上周再宣布以3.5億元作價,將旗下新渡輪業務全數售與信德(00242),此外在六月份就透過附屬公司以11億元增持杭州繞城公路權益,由21%增至33%,管理層表示,未來會進一步以道路及水務等作為核心業務。

踏入八月份,新創建股價呈V形走勢,最低跌至9.5元,但之後迅速回升,昨日逆市再升近2%,收報11.5元,重返月初水平,但現市盈率仍不足九倍,而股息率就有5.5%,在後市欠明朗之際,不失為穩陣收息之選,不妨喺11元樓下吸納,目標12.7元,止蝕10元。

新創建(00659)

目標價:12.7元

止蝕價:10.0元

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!

志強