Fundman睇市：港華燃氣估值具上調空間

全球電腦業大執位幾成不爭事實，例證除咗蘋果公司取代埃克森美孚，成為全球市值最大上市公司、股價突破400美元外，連坐喺個人電腦第二把交椅嘅戴爾電腦，前晚亦不得不承認受到蘋果嘅威脅而下調銷售預測，令股價急挫一成至14.2美元，而其他科技企業業績表現參差不齊，納指隔晚跌0.47%，報2,511點。

歐美股市近日雖有回穩迹象，但債台高築嘅負債表始終拖住股市後腳，前日就有人質疑花旗國喺上月批發物價指數升幅高過預期下，再推QE3只會令通脹火上加油，而兩位聯儲局地區行長亦懷疑QE3嘅成效，睇嚟即使聯儲局下個禮拜五喺Jackson Hole開年度會議，看官亦唔好咁老定可以重溫舊年開完會後推出QE2，令股市爆升嘅美夢。

啱啱舉行完嘅德法峰會，並未有好似外界預期咁推出歐元區債券或者泵水落歐元紓困基金，取而代之嘅係重提徵收金融交易稅、成立經濟議會，措施未能緩和投資者嘅擔憂情緒之餘，對解決歐債問題更加係隔靴搔癢。

而雪上加霜嘅係，消息指花旗國嘅監管當局，加緊對本土與歐洲銀行有連繫嘅機構進行調查，再加上英國上月零售銷售增長遜於預期，連同早前歐元區經濟增長呆滯，令經濟再度探底疑慮重燃，難怪執筆時英法德股市早段分別急跌2至4%。

經濟衰退陰霾籠罩，最直接反映嘅係金價飆升同美債息下跌，金價前排衝高稍作整固後，尋日曾大升逾16美元，衝破每安士1,800美元大關，而30年美債息亦連續兩日下跌，可見避險情緒急升溫。

西氣東輸帶動需求

雖然港股有阿爺照住，但尋日兩萬大關仍然係危危乎，而且技術上已失守10日線支持，中資券商股升勢亦無以為繼，加上祖國加息預期升溫、內房調控持續同出口放緩等因素繼續困擾大市，目前惟有先寄望萬九關能夠守一守。

市況波動，揀股都係要選防守力強的股份。隨着多條西氣東輸管道正在興建，包括至廣州的西氣東輸二期管道、及漳州至湘潭的分支管道，將增加市場對供氣需求，燃氣股可視為穩陣之選。

不過，從過往經驗所得，不是所有內地燃氣股均具防守力，內地燃氣分銷商是以收取接駁費及向工商業客戶供氣，以賺取收入，只有執行能力較強的公司，才可保持強勁的盈利增長。於內地燃氣股中，筆者最看好港華燃氣（01083），主要是其母公司中華煤氣（00003）實力雄厚，兼具注資概念，加上其今年首四個月天然氣銷量升兩成，下周一公布的中期業績隨時有驚喜。

摩通最近發表報告指，上半年港華燃氣的營運數據將錄得強勁增長，將公司的投資評級由「中性」調高至「增持」，目標價由4元調升至5元，預料今明兩年盈利分別為5.5億元及6.98億元，分別調高1%及2%。

港華股價近日連續四天現陽燭，重返多條重要平均線上，昨日高見4.22元；最後收報4.21元，逆市升0.72%。若業績對辦，可望引發大行重估，股價可繼續跑贏大市。