股海實戰：潤電質素唔曳

領導人訪港期間，中移（00941）及金融股苦撐大市，不過等到尋日貴人一去，港股弱勢又再表露無遺，恒指收市險守兩萬點關。前日炒高嘅券商股一如所料全線大飲茶，可見呢期炒家行動要迅速，不論賺蝕都好，盡量即日埋單計數，妥善管理持倉風險。

中移公布中期業績後跌0.5%，收報75.15元。公司半年賺613億元（人民幣．下同），增長6.3%，雖然增長僅單位數，但已勝於市場預期，每股派息1.58港元，期內經營業務現金淨流入1,261億元，截至六月底止集團現金及銀行結存餘額3,300億元。業務增長平穩、年息約4厘，加上手持可觀人仔現金，似足公用股「四平八穩」，股市大升大跌都可以唔使預佢份！

短期選股避險為主

身處大淡市，股票對好消息冇大反應，對壞消息就十分敏感。好似呢幾日中央高姿態表明撐香港金融業發展，多個等咗好耐嘅政策終於有進展，但奈何不敵外圍淡風，連呢期嘅強勢股──金飾股，尋日再創五十二周高後即掉頭倒跌收市，實非好兆頭。提防月底期指結算前股市波幅再度擴大，短期能忍則忍，選股宜以避險為主。

中資電力股尋日發揮抗跌本色，華潤電力（00836）、大唐（00991）、華能（00902）、華電國際（01071）均逆市報升。講到呢類股，阿莊鍾情潤電，皆因呢幾年業績跑贏同業，說明公司嘅管理能力以及發展策略勝人一籌。

上周，公司宣布七月份售電量（按合併口徑統計）同比增長13.6%，而首七個月累計售電量則增長22.3%。潤電一項勝於同業之處，是早已着手向上游業務延伸，積極參與山西嘅煤礦業整合及重組，今年首七個月的煤炭產量同比增長53.8%，有助穩定原料供應及控制成本。

除了傳統火電項目外，近年公司積極投資可再生能源項目，特別是開發及建設風電場，雖然呢一刻尚處投資期，但阿莊相信，呢項發展係順應國策和行業發展之舉，與投資上游煤礦業務一樣，成功執行的話，長遠足可令公司在行業中脫穎而出。

還有，次季母公司華潤集團董事長宋林親自上陣，重新執掌潤電主席一職，足見母公司睇重呢瓣業務，全力支持。總括而言，可繼續視之為首選電力股。股價方面，料下半年大致喺12至16港元水平上落，可留意下周一公布的中期業績表現。