樓市出更：四叔唔怕起萬個居屋

近排市場已經傳得好行，嚟緊施政報告會落實復建居屋，如果係真，私人住宅樓價都幾難會睇好。不過，地產界「大孖沙」繼續表明立場，恒地四叔李兆基話唔反對復建居屋，仲話起夠一萬個都唔怕，因為佢認同政府要解決市民住屋問題，四叔為升斗市民發聲。

四叔表明唔反對復建居屋，認為政府要幫助縮窄貧富懸殊同社會穩定；佢仲屈指一算，話政府加起嚟建5,000個單位唔算多，就算1萬個都唔怕。不過面對調控政策，四叔對未來一兩年樓價就唔係睇得太好，覺得未必會大升。

樓價未來兩年難升

回歸以來香港樓市大起大跌，四叔李兆基一針見血指出問題在於供求失衡，但以前嘅「八萬五」矯枉過正多過頭，仲話呢兩三年大約一萬個單位，中肯啲，唔太多亦唔太少。另外，近年內地日益富裕，多咗內地人來香港買樓扯高樓價，同時亦和賣地成交價有關。

唔知係咪回應坊間經常批評地產霸權，四叔輕描淡寫「拋番個波」畀政府，佢話每次投地都投到好貴，貴買當然要貴賣，唔關地產商事，問題係香港土地少、貨少，政府賣出價自然就唔會平啦。

轉手賺錢連跌3月

話時話，樓價真係升得好癲，早排仲過埋九七高峰，業主梗係幾乎沽親都賺啦，之但係近月樓市麻麻哋，依家已經無呢支歌仔唱。啱啱睇到一份代理研究報告，原來七月已知購入價嘅2,988宗二手登記當中，獲利比率得番96%，唔覺唔覺連跌三個月，累跌多達3個百分點。

早前樓市未調整，「九七蟹貨」就算蝕都未必入肉，但老友美聯鄧涇渭話，元朗朗晴居10座低層C單位啱啱以287萬元成交，原業主喺九七年摸頂入市，帳面蝕咗108.1萬元。