短炒倉：英皇國際抵買之選

中央公布「禮品」名單，券商股成為最大得益者，尤其係具中資背景嘅，走勢尤其凌厲，不過整體大市反應就唔大，恒指高開低走，升得70幾點散場，同當年憧憬港股直通車炒上3萬點的情景，不可同日而語。

當然，有意見認為今時今日內地有銀士要買港股，其實早已有不少渠道，故小QFII對佢哋嘅吸引力已不大，不過睇番目前A股較H股，不少仍存在唔細嘅溢價，洛玻（01108）、儀征（01033）、東北電氣（00042）等，溢價更係以倍數計，對內地投資者來說屬相當抵買，新政策對港股的正面影響不宜過分低估。

市盈率僅1.57倍

講到抵買，志強長期關注嘅英皇國際（00163）亦係抵買之選，該股今日除淨，每股除息5.2仙，而合計去年全年派息0.1元，息率逾6厘。雖然今日買貨冇份收息，但相信亦無損股份嘅吸引力，皆因集團截至三月底止年度賺34億元，每股盈利1元，每股資產淨值為3.6元，現價往績市盈率只得1.57倍，真係平到無朋友，而大股東楊受成在公布業績後的過去兩個月內，一直有增持行動，最近一次是在本月十一日，以均價1.507元買入130萬股，現水平跟進亦揸得安心，以昨日收市價1.57元計，相當於除淨價1.518元，建議可於1.5元樓下吸納，目標2元，止蝕1.35元。

英皇國際（00163）

目標價：2.00元

止蝕價：1.35元