Fundman睇市：業績勝預期大昌行睇位入貨

港股上星期二最多急跌逾千六點，去到18,868點的後海嘯低位，輾轉反彈過千點，股民慶祝「執番身彩」，可是有迹象顯示，大市焦點又回到經濟層面上。唔信？過去兩日，先是歐美股市大升，恭賀Google買下摩托羅拉轉戰手機市場，再來是副總理李克強旋風式來港送禮，但恒指兩日加埋只係升得28點，主板成交仲愈玩愈縮，由周一的710億元，到周二742億元，尋日更得番679億元，反映大市波動性同大戶入市興趣，同樣係愈玩愈縮。

○七年第一次講港股直通車，恒指三個月內，由19,387點升到31,958點創新高，事隔四年小直通車開行，但恒指即日的反應係由20,318點升到20,504點，最後撻番去20,289點收，市場反應說明一切，港股直通車同高鐵一樣，車速快但缺乏乘客，試想假如手揸人民幣嚟港買大國企，部分根本仲貴過內地，神華（01088）A股就比H股平5.6%、海螺（00914）13.4%、農行（01288）15.8%、平安（02318）23.8%，仲未考慮換港元手續費同埋每年貶值3至4%，即使係想買細價股，今時今日A股通街平貨，又何需勞師動眾？尋日的政策係一個好的開始，但話對港股及本地券商有好大幫助？反正史提芬就係唔信喇。

筆者愛股大昌行（01828），收市後公布中期成績，上半年營業額升39.6%至198.1億元，純利升63.5%至8.01億元，減去出售物業的一次過收益8,100萬，仍較分析員預測的6.85億多出5.1%，每股盈利升60.9%至0.4387元，中期息派0.143元。

中高檔汽車銷情佳

曾憂慮內地收緊信貸，以及日本三月大地震影響汽車供應鏈，會對大昌行汽車代理及4S生意造成不良影響，但業績令人喜出望外。

儘管內地整體汽車市場只有3.4%增長，但連同去年收購的代理業務，大昌行內地汽車銷售量升48.2%，營業額則增加57.6%，至129.6億元，佔整體汽車分部營業額81.4%，主要是由於公司主力打進中高檔汽車市場，表現優於中低價汽車，以及4S特約店經營策略成功，目前大昌行擁有59間（去年為55間）4S特約店，並取得11個城市的代理權，當中包括一汽大眾奧迪及雷克薩斯。

至於港澳地區方面，汽車業務營業額升10.3%，主要是代理歐洲品牌，包括奧迪和賓利銷售強勁帶動。

同時，大昌行亦積極打開內地食品貿易市場，上半年銷售額升35.5%，但對比下，大部分投資者可能仍是對汽車業務興趣較大，管理層就維持每年增加10至15間4S特約店的目標，並預告在年底前，增添兩個國際知名高級汽車品牌代理。

相比於競爭激烈，且近期有供過於求的汽車生產企業，筆者更喜歡大昌行專攻代理及4S店的營運模式，公司佔相關市場不到2%的市場份額，隨着過去幾年汽車的銷售經歷高增長期，未來的售後服務市場，相信會比一手車銷售更理想。大行預測明顯流於保守，估計一二年盈利不難去到17.5億至19億元，市盈率十倍左右，9至10元應該是長期投資者理想的入貨區域。