股海實戰：神數全面「升呢」

國務院副總理李克強率領一眾金融高官來港，隆而重之宣布六項惠港措施，為「十二五」香港經濟發展打氣，港人心裏很是感激，但當今特區政府嘅施政能力成疑，還望一眾港官醒醒定定做好本分，別再辜負中央好意及港人期望！

有關喺內地推出港股ETF，以及允許推行RQFII嘅消息，刺激券商股狂飆，有啲炒過龍，尾市獲利回吐壓力大，但埋單計申銀萬國（00218）及第一上海（00227）仍升逾兩成，國泰君安（01788）及海通（00665）分別升9.9%及8.5%。畢竟措施係好，都要時間體現效益，再睇今年上半年券商股生意係近年最差，嚟緊公布嘅業績唔慌好，所以唔建議入場高追接火棒！

查實除券商股外，銀行、保險、醫療、法律、建築、旅遊等多個領域均可受惠新措施，但今時唔同往日，依家金魚缸缺「水」，長期措施對刺激股市短線表現嘅作用大打折扣，昨日市況先升後回，最終恒指僅升76點，收報20,289點，成交僅680億元，正好說明現實！

昨見中移（00941）業績前夕股價偏強，金融股氣氛佳，獨見地產股沽壓較大，唔排除大戶托住中移沽其他重磅股，加上歐洲情況又再令人憂慮，短線恒指衝唔上20,500點樓上就要掉頭，咁嘅話可能要試番19,500至19,800點水平支持先有得諗。阿莊尋日見隻中興通訊（00763）升近10日線回頭，估計未必能一口氣回補下跌裂口位，遂以均價19.36元沽出3萬股，短炒獲利5.58萬元。

捕捉城市化商機

陸續有企業派成績表，神州數碼（00861）截至今年六月底止首季營業額續創單季新高，達160億元，同比增長23%；純利亦增長約23%至3.57億元。單季毛利率亦為近年較高水平，達7.63%，季內經營業務現金淨流入1.58億元，總體經營情況保持良好。

本年度係神數開始面向「智慧城市」戰略轉型嘅第一年，未來業務將循城市訊息化基礎設施、移動互聯終端與應用、行業與企業市場、智慧城市運營服務、智慧城市協調產業五大領域發展，全面捕捉中國城市化嘅商機。憑着過去管理層嘅優良往績，阿莊對今次神數全面「升呢」投下信心一票，股價喺12元或樓下，計劃會分注買進。