樓市出更：旺角舖王呎價65萬

旺角一向以不夜天聞名，喺新世代80及90後的「蒲點」，其中首選「搵食」街道，就非登打士街一段莫屬，呢條街唔少商舖租客都係特色小食店，由於條街人流如鯽，租戶承租能力亦非常高，舖位價值連年飆升，好似登打士街就啱啱賣咗一個街舖，雖然成交價只係四千幾萬，但係個舖面積只係得63方呎，所以成交呎價高達65萬，成為旺角「舖王」，全港計排行第3。

月租七萬 回報兩厘

上面講個舖係登打士街43H號地下雙號數，依家由特色飲料店租用，啱啱畀投資者用4,100萬元購入，有代理對劉Sir講，個舖實用面積相信只有約63方呎，以成交價計，實用面積呎價就差唔多65萬元；估計個舖市值月租大約7萬蚊，收租回報約兩厘，以目前零售核心區舖租回報計，已算唔錯。

登打士街舖比起銅鑼灣波斯富街雙號全港「舖王」，其實用面積呎價約84.4萬餘元，只係相差22%。而登打士街亦係首次擊敗同區西洋菜街，登上全旺角最貴呎價舖位。據土地註冊處資料，上述舖位上手業主喺○五年買入，買入價大約1,566萬元，現轉讓帳面「袋」約2,534萬元，賺幅約1.6倍。

深水埗舖438萬放售

樓市無起色，唔少業主搵代理放盤，或搞吓拍賣催谷，部分財力充裕嘅業主會自掏腰包登廣告，以提高物業曝光率。一名住宅女投資者早前買咗深水埗一個地舖，依家除咗放畀代理外，自己登咗個廣告，明碼實價列名叫價438萬元放摸貨，見票即收，希望雙管齊下，好過坐喺度等。業主仲話，個舖位於順寧道25號和豐大廈單號舖，面積大約400方呎，本月初約350萬元買入，依家租畀洗衣店，月租6,500元。