短炒倉：合景泰富反彈未完

雖然中央大員訪港，市場憧憬或有禮物派，不過港股就未能以升市贈興，高開低收。

講到唔畀面中央嘅，其實唔單止係港股，尋日就有消息指，中央為調控內地樓市，表明要擴大限購令至二三線城市，但政策卻遭到地方政府的重重阻撓，更有面臨難產的可能。正所謂「上有政策，下有對策」，一向係祖國官場嘅潛規則，但對一眾久受政策打壓嘅內房股嚟講，就有理無理，炒咗先算，就算政治不正確都係咁話。

銷售金額可望達標

不過，若果話內房股反彈係純粹借題發揮，亦唔係咁公平，事實上，即使市況欠佳，但不少內房股今年上半年銷售表現仍然相當不俗，以剛剛發中期盈喜嘅合景泰富（01813）為例，集團七月份預售金額為10億元（人民幣．下同），按年增長達68%；而首七個月合計，預售總額75.4億元，已完成全年目標150億元嘅一半。由於下半年集團仍有數個新項目推出，達標可期，難怪大行亦紛紛出報告唱好，瑞信睇5.9元，花旗更進取，睇8.84元，相對昨日收市價4.97元，仍大有上升空間，短線可博返回6元水平，止蝕4.6元。

合景泰富（01813）

目標價：6.0元 止蝕價：4.6元