Fundman睇市：富士康高風險博唔過

谷歌（Google）以125億美元收購摩托羅拉，消息刺激美股連續第三日反彈，道指升213點，報11,482點，但話晒港股由上星期二低位起，已經反彈超過千五點，借住有咁「利好」股市消息，大戶一個唔該沽貨食胡，加埋午後歐元區老大哥德國公布第二季GDP令市場失望，得0.1%增長，咁多歐盟窮兄弟要佢救亡，經濟動力如此疲弱點算好？恒指結果先升後倒跌48點，報20,212點，最難睇係前日港股偷步大升640點，成交得710億元，到昨日大戶見「頂頂哋」掉頭派貨，成交額反而增加，去到744億元，可見等反彈掟貨，比趁低買貨的基金經理，積極得多，似乎好友在二萬點陣地，仲未守得相當穩陣。

美銀美林八月為環球基金經理做咗次調查，四個重點係：基金經理對經濟衰退憂慮升溫、基金現金水平普遍上升、對上市公司盈利預測樂觀程度，以及在股市的資產配置下跌，意味股市短線提供一個人人自危的買入機會。數字上，擔心經濟衰退的芬佬比例，由一個月前的13%翻一番去到29%，基金淨現金水平由一個月前的4.1%升至5.2%，是三月九日以來最高，認為如果標普五百指數跌穿1,100點（周一晚在1,204點），會觸發聯儲局推出QE3的比例由28%升至60%。

講番谷歌收購摩托羅拉，動機路人皆見，近年積極發展智能手機及平板電腦系統Android的谷歌，八月份數據顯示，這開放給手機商免費使用的平台，市佔率逾五成，Android已算獨步市場，唯獨谷歌雷聲大雨點小的Google Phone，未能成功打入主流市場，可見谷歌買下摩托羅拉，肯定是希望捲土重來，挑戰蘋果公司iPhone，由軟到硬件一手包辦的產業結構。

谷歌收購難睇好

史提芬對交易唔係咁睇好，想飲牛奶何需自己養牛？Android的成功在於開放程式源碼，多隻香爐多隻鬼，谷歌加入手機界，角色由軟件協作者變成競爭對手，其他手機公司有冇興趣繼續發展Android手機，值得深究。而且蘋果公司沿用同一模式三十五年至有今日，這種策略是否容易被迅速複製？我就話唔易，否則微軟老早經已做咗。

有理無理，市場炒收購概念，RIM及諾基亞股價前晚被掃高，後者近日與微軟眉來眼去，放棄自己研發的MeeGo系統，轉為用十畫只得七八撇的微軟WP7，但亦因此被華爾街炒家睇上。但同樣一句，話晒諾基亞市值大過摩記近倍，達235億美元，仲有唔少微軟唔啱用嘅生意，計埋溢價，無400億美元落唔到樓，微軟董事局點會傻到以本身市值近五分一的巨注（谷歌交易僅為其市值的十四分之一），押落去隻沉緊嘅航空母艦度？

講到亂嚟，都不能不提尋日中港台手機零部件供應及代工股份，富士康（02038）彈一成二，打一句問一句，史提芬都唔信摩記被收購，會對富士康代工生意有好大幫助，反而華南地區一帶的勞工薪資不斷提升，掌舵人郭台銘早前在公司舞會上，意興闌珊透露未來幾年投資三百萬個機械人取替工人，市場當一宗笑話來看，但可見成本壓力對這代工王來說，是何等嚴峻！富士康二十九日交中期成績表，大行預測兩極化，由賺7,300萬美元（下同）到蝕2,600萬元都有人估，以半年計，過去兩年半富士康僅得○九年下半年有錢賺，去年上下半年各蝕1.42億及7,568萬，睇嚟中期唔蝕已經係好消息，但咁高風險加埋咁嘅市況，點博！