股海實戰：阜豐重現增長動力

京官訪港大陣仗，預期會喺今日揭曉嘅「京城大禮」，能否挽救港人於水深火熱，為香港發展尋找出路，阿莊自覺愈諗愈傷神，都係用一顆平常心看待！港股尋日先高後低，恒指早段衝上20,431點後回落，午後受A股低收拖累，結果恒指收報20,212點，跌48點，成交略增至744億元。

下半年中央嘅宏調政策，預料將由「適度寬鬆」變為「定向寬鬆」，若八月份數據確認通脹見頂，而經濟增速持續放緩嘅話，九月中央出招刺激經濟嘅機會不能完全抹殺。事實上，歐美債務危機及經濟衰退好難喺短時間內有大改善，情況冇惡化已經可以當好消息炒。咁究竟八月跌市係全年低位抑或係大跌浪嘅開端，九月A股表現頗為關鍵。

業績欠佳已作反映

個股方面，「冇得撈嘞」被購併嘅消息帶起手機設備股，富士康（02038）借勢抽高超過12%，收報3.86元，但似乎炒得有啲牽強！業績股表現參差，好似隻東岳（00189）半年純利增逾四倍但冇息派，股價一度被質穿7元關，照計冇派息都唔使咁洗倉法，睇唔明就惟有放埋一邊。反觀勝獅貨櫃（00716）就大發神威，中期純利大增近九倍兼派息，股價彈11%。管理層大派定心丸，看好下半年表現，引證股價超低殘，短線有力上番2.8元。

繼續講業績股，阜豐（00546）今年上半年賺4.2億元人仔，同比減少8.7%，主要係玉米及煤炭等原材料成本上升，令毛利率下跌3.1個百分點至21.7%所致，不過過去九個月股價由高位回落逾五成，某程度已反映咗業績表現。

綜觀各項主營業務，旗下嘅黃原膠產能使用率已近飽和，預計下半年會帶來不俗嘅盈利貢獻；位於內蒙呼侖貝爾嘅廠房九月將投產，屆時旗下味精及谷氨酸嘅產能將得到提升，加上內蒙煤炭成本較低，料下半年毛利率可喘穩；至於內蒙嘅蘇氨酸產能，下半年會着手擴產至年產三萬噸，將發展成為一個新嘅盈利增長點。

雖然要應付多項擴產措施，好在公司喺今年四月成功發行3億美元五年期優先票據，截至六月底止手頭現金等值13億元人仔，有足夠財力應付發展。若短期股價守住4元關，可確認回穩，現價預測往績PE六倍，保守地以預測PE九倍計，合理價4.9元，低位3.57元不容有失。