樓市出更：東頭邨公屋劈價即賣

人心虛怯，市場多咗業主劈價，反映對後市失去信心，市場200萬以下私樓多番，咁價位喺200萬樓下的市區公屋，就少咗吸引力，公屋業主想喺呢個時候賣樓套現，就要劈價，劉Sir收到料，話放盤一向唔多嘅黃大仙東頭邨，罕有出現劈價同低價成交，一個低層1房單位業主肯劈價近半成出貨，而裕東樓亦有個低層單位，以綠表價低至呎價1,987元賣咗，創屋邨今年新低。

東頭邨一向放盤唔多，一年都係得幾單成交，今次有業主肯減價8.5萬，已經迅速畀區內用家接咗。世紀21何美英話，個單位係康東樓低層4室，建築面積388方呎，成交價166.5萬元，比原叫價175萬平咗近5%，平均呎價4,291元，低過市價水平。

三年賺逾86萬算和味

原業主响○八年金融海嘯時用公屋自由市場白表價80萬買入（上手業主已經補埋地價），計番每呎只喺二千幾，今次轉手帳面賺咗86.5萬，升值成倍。賺價咁可觀，平少少走都無所謂啦。

為求出貨，有業主仲愈劈愈深，同屋邨裕東樓有個低層8室463方呎單位，最近以綠表價92萬元成交，折合每方呎只係1,987元，創東頭邨今年成交價及呎價新低。何美英指，原業主上個月原先叫價118萬元，之後減至100萬元，其後一減再減至92萬元沽出，前前後後減幅超過兩成。

狂加租 拍賣會搵新竇

近年租金狂升，唔少租客都好頭赤，環亞物業拍賣董事曾傑俊慨嘆，近期拍賣生意已經差，加上喺尖沙咀一間酒店租用咗十年搞拍賣會嘅地方，業主早前通知話嚟緊要加租，加幅高達五成，同埋日後租用時間都要再夾。為節省成本及時間，呢排忙於喺同區及佐敦多間酒店搵新地方，而未來兩個月就暫時短租灣仔一間酒店搞拍賣。