鄭海泉過「電」入局

鄭海泉（Vincent）由滙控（00005）執行董事之位退下火線之後，大家都估佢其實都係退而不休，而太子早排見佢精神好好。

加入中電袍金40萬

各大上市公司一早已經對這位不可多得嘅銀行家虎視眈眈，希望將佢網羅入局嘅為數不少，結果佢同中電（00002）「過到電」，尋日正式宣布鄭海泉入局做獨立非執董。

Vincent一直都有唔少其他職務在身，包括係港鐵（00066）、匯賢（87001）嘅獨立非執董，同埋太古地產嘅非執董，今次仲同埋前廉政專員羅范椒芬，齊齊入去中電董事局，每人每年嘅董事袍金係40萬元。

今次委任唔算意外，因為Vincent做咗咁多年銀行，退下火線之後都講過，希望退休之後專注公職，揀公用事業龍頭之一嘅中電合乎情理。

記得啱啱退休嗰陣時，Vincent話食歡送飯局都忙到不亦樂乎，仲話食完之後，過番咁上下時間先諗去咩公司做嘢，睇嚟Vincent已經將歡送飯局消化得七七八八，要羅致佢入局嘅大公司要快手喇。