股海實戰：昆能博取兩成回報

股海大風大浪過後，又再重現生機。港股尋日隨外圍高開，上晝仲以為彈到兩萬點就止步，誰知下晝A股升幅擴大，加埋憧憬京官訪港送大禮，恒指繼續挾高，結果收報20,260點，升640點，可惜成交僅711億元，略嫌不足，暫只能以反彈市看待，10日線阻力位喺20,633點。阿莊認為，除非係有關「港股直通車」一事有進展，否則別對京官「派糖」存太大期望。

上周提及若然中報對辦可取嘅一拖（00038），業績令人失望，半年純利同比僅增2%，故見股價受壓，曾低見6.95元，收報7.18元，跌6%。既然業務增長有變數，短線股價料反覆尋找支持，惟有另作他選。上周五買入嘅中興通訊（00763）終於有反彈，收報18.36元，升5.5%，19.66至20.8元有一下跌裂口位，且看今浪反彈能否成功回補。

內銀業績防見光死

尋日中資保險股作報復式反彈，平保（02318）及國壽（02628）分別升8.9%及6%，內銀股亦開始炒定業績消息，但提防又係見光死！總之阿莊就叮囑一句，困擾全球金融市場嘅歐、美債務危機未消，身處反彈浪，短炒要量力而為！

反而，中線低吸實力股勝算較大，選股可從流通性較高嘅大價股入手，事關喺今次基金套現潮中，呢類股跌得最傷，股價跌得最殘！中石油（00857）旗下嘅昆侖能源（00135），由月初13元水平，跌至上周低見10.6元，眨眼返回去年十一月嘅起步位，尋日終於來一次似樣嘅反彈，以挨近全日高位11.34元收市，升幅4%，成交1.16億元。

母公司成強力後盾

老實講，以昆能最終母公司貴為全國最大國有油氣企業，日後喺拓展天然氣終端銷售業務方面不愁氣源問題，更可透過母公司覆蓋全國嘅網絡支援，發展較同業享有絕對優勢。再睇「十二五」期間，喺國策支持下，內地天然氣市場將呈快速發展，用戶滲透亦會明顯提高，故昆能係唔少基金長期捧場嘅能源股，若非今次基金不論好醜瘋狂沽貨套現，好難想像呢隻股喺唔到半個月時間就落番起步位。

由於10元水平係舊年嘅起步位，若然業務發展未有重大變化，估值具吸引力，實力派可以喺呢啲水平入些少放喺倉底，中線可望穩坐兩成回報！