魚缸Blogger：大成生化強勢未止

今個禮拜歐美市場冇乜重要數據公布，加上A股走高，令資金尋日放心買貨，帶動恒指全日大升640點，收復20,000點關口，報20,260點。

不過，恒指同多條主要移動平均線仍然係可望而不可及，料指數會繼續喺19,500至20,600點波動。尋日大市升勢全面，買咗貨嘅股友不妨set定止賺睇位走人。個股方面，一拖（00038）業績遜預期跌逾6%，而味千（00538）亦曾被質至一年低位8.7元。

提升產量降成本

身處亂市，跟進強勢股不失為一個自保嘅選擇。大成生化（00809）主要產銷玉米相關生化產品，銷售至歐美、非洲同內地，而集團近日喜事重重，繼早前發盈喜，指中期盈利將大幅增加後，近日亦宣布旗下技術改良嘅工作成功，將令主要產品賴氨酸嘅年產量大增六成，無形中令平均成本下降，有助帶動盈利表現。

雖然集團股價連續三日以大陽燭強力反彈，但14日RSI仍處58健康水平，成交亦見配合，相信喺業績公布前仍有炒作，如回試20日線2.66元附近並能守穩，不妨順勢跟進，先睇3.4元，2.5元止蝕。

大成生化（00809）

目標價：3.4元 止蝕價：2.5元