油麻地舖46年賺500倍

零售消費持續強勁，一線靚舖業主攬住嗰舖收租唔放賣，部分巨額游資惟有轉投二、三線舖位，而該類舖位業主，大多係持有相當長時間，所以一旦轉手，獲利幅度往往係數以百倍計，有代理話，油麻地窩打老道40號大單邊地舖連閣樓，投資者拍板以約2.4億元買入，原業主持有個舖四十幾年，轉手升值差唔多500倍，反而最多人投資的，住宅賺幅就望塵莫及矣。

一線舖惜售 盤少如古董

近期股市大上大落，唔少資金都轉投升值潛力較高的商舖，奈何一線街舖放盤極少，有資深投資者更以「古董」來形容持有的靚舖，可以話係賣一個少一個，除非買家出價極理想，否則絕對唔會輕易賣。

既然買唔到一線舖位，資金亦惟有流入二、三線街舖尋求投資機會。利嘉閣劉偉成同劉Sir講，窩打老道40號地舖連閣樓，面積加埋大約4,400方呎，原業主六五年只係以49萬元買入，並自用作燈飾舖。不過，舊年已經唔用，租咗畀一間銀行，每月租金約30萬元，日前終於以約2.4億元賣咗，帳面「袋」超過2.3億元，賺幅大約489倍。

舊區博重建 靚舖賺2千倍

上址附近一向唔算係零售旺區，依家有客斥巨資約2.4億元購入，呎價大約5.4萬多元，算係好理想，相信可能係新租客背景夠吸引，加上物業位於大單邊及港鐵站出口隔籬。

舊區重建價值高，過往唔當眼的地舖，其成交價往往可以勁升千倍。早排灣仔蘭杜街有一個由食肆租用地舖，早前以超過1億元賣出，原業主持貨半世紀後轉售，舖位升值就高達2,000倍，賺幅都咪話唔犀利。