股海實戰：國美可搭順風車

今年股海五窮、六絕、七冇得翻身，八落入人間煉獄……。面對自○八年金融海嘯以來最大規模嘅全球資金避險潮，股價低殘、金價飛升。不過，資料顯示，國際炒家正大手減持黃金期貨，大量避險資金瘋狂流入金市接貨，造就大鱷坐享巨利，但當股市回復平靜，金市極可能喺人踩人之下出現較大幅嘅調整，故不建議現水平才高追與黃金相關嘅股票及ETF產品。

動盪當前，各國陸續出招維穩，繼希臘、土耳其及南韓後，法國、西班牙、意大利和比利時均禁止沽空金融股。上周五歐、美股市回穩，今日港股可順勢高開，而展望本周，波幅可略為收窄，估計恒指會喺19,600至20,600點水平上落。

自美國世紀降級之後，美債價升息跌，聯儲局更揚言兩年內不動息，相信最終想迫使資金轉持較長年期嘅美債，甚而為爭取較合理嘅回報，從國債市場流出，重新投入市場，以達致推動經濟復甦嘅目的，且看如意算盤打唔打得響。另一方面，聽聞美國總統奧巴馬近日與當地巨企頭頭密斟救市，且看短期內會否有新措施出台。

人仔升值壓力大增，為增匯率彈性，打破單邊升值嘅預期，上周市場盛傳短期內中國將擴闊人民幣匯率波動區間。事實上，讓人仔升值只會吸引更多投機資金流入，對中國沒有好處。講開又講，多得次季以來中央閂水喉，A股持續調整，故見今次外圍大跌，中國市場所受嘅影響有限。上周傳來社保入場買A股，若然國家隊繼續入市，對A股後市有正面啟示。

上周提及留意低吸中興通訊（00763），上周五低見17.3元，14日RSI跌穿20，阿莊認為調整幅度經已差唔多，遂入場試水，以均價17.36元買入3萬股。

有力挑戰4元大關

搞完超跌股，又睇睇強勢股。國美電器（00493）上周二隨大跌市插到落3.1元後止跌，之後連彈三個交易日，上周五收報3.67元，升6.6%，與五十二周高位3.8元相差不遠，單日成交達到5.15億元，其中有1.04億元係沽空。好明顯，有人辭官歸故里，有人漏夜趕科場，大撼大，但Buy side實力較強，若成功抽穿五十二周高位，踢上4元大關，將迫使空軍補倉，不妨留意搭順風車嘅機會，上望4元，下穿3.45元止蝕。