魚缸Blogger：皇朝傢俬反彈未完

恒指上周五高開360點後，本以為可以更上一層樓，可惜晏晝喺法國第二季經濟增長原地踏步嘅消息影響下，恒指一度倒跌，埋單僅升24點，報19,620點。

歐元區四國禁止沽空金融股，但當年金融海嘯正係由於各國禁止沽空，影響銀行同業拆借市場，結果一石激起千重浪，貝爾斯登倒閉、雷曼兄弟崩潰，因此禁止沽空只係治標唔治本。

中期業績發盈喜

外圍市況不穩，提振內需已成為中央推動經濟重要嘅板斧，皇朝傢俬（01198）主要喺內地從事傢俬家具嘅零售同批發，受惠銷售量增加同產品價格上升，集團剛發盈喜，預料今年上半年純利將有逾40%升幅，加上集團繼○八年取得北京奧運合約後，又為現正於深圳舉行嘅世界大學生運動會提供家具，當中既凸顯集團嘅龍頭地位外，更能大大提升知名度，有效帶動日後收益。

今個月以來，皇朝股價隨跌市調整，累計幅度達三成，上周五喺中期業績公布前夕現反彈，若業績對辦，相信反彈冇咁短癮，目標試叩3元關，穿2.38元止蝕。

皇朝傢俬（01198）

目標價：3.00元 止蝕價：2.38元