樓市年底有力彈

美國歷史性被降主權評級，觸發環球股市震盪，加上本港賣地成績亦唔理想，雖然香港有阿爺喺背後撐住，但始終好難獨善其身，令原本急速攀升嘅本港樓市同經濟突然出現暗湧，相信依家唔少人個心都十五、十六，究竟應唔應該趁業主減價入市。同劉Sir相識多年嘅科達地產湯君明見證過多次樓市風浪，佢認為依家只要選擇得宜，其實亦係入市良機。

上個禮拜沙田九肚幅「限量」豪宅地以底價成交，令所有人都跌晒眼鏡，加上環球經濟隱憂，同埋政府繼續增加土地供應，都令原本低迷嘅樓市雪上加霜，劉Sir相信短期內樓市可能要回一回氣。

九月前伺機入市

不過，有危亦有機，同科達地產湯君明傾開，睇番近排樓市受到多重打擊，會唔會繼續差落去，翻唔到身，佢就話短期內樓市難免會出現唔理性情況，唔少準買家會採觀望態度，但本港整體經濟基調良好，股市波動，令樓價回落，反而由依家八月起到九月，都係買樓嘅好時機。由於今次受影響最嚴重始終係歐美國家，所以預計香港樓市震完一輪之後，到年底就會反彈。

阿湯又話，現時市況交投顯著萎縮，樓價只係乾升，所以唔好盲目追一啲「摸頂貨」，反而一啲位處舊區、呎價約莫3,000至4,000元的單位，若果收租回報率有3厘水平，就不妨考慮吸納。他解釋，現時唔少新發展項目成本高昂，每方呎成本動輒需約5,000元，反而舊發展區交通及生活配套設施較新發展區完善，樓價反而仲穩陣。