Fundman睇市：匯賢信託博財息兼收

對股民而言，星期三又係一個難眠之夜，壞消息層出不窮，今次輪到法資銀行法興出事，重挫對未來仍存有一絲希望的股場好友。市場憂慮法國、意大利及西班牙會失去AAA債務評級，歐股平均跌4.5%，法股跌5.5%，主角法興股價急跌20%，五年期CDS則急升一成九，去到580點，法興違約風險創今年新高，道指跌519點。

港股尋日低開464點，最多跌514點，去到19,269點，午後A股高收及法興高層澄清謠言，以為港股有機會倒升，可惜收市前恒指跟期指又再隊過，最終跌188點，報19,595點，期指客買定保險以免瞓醒美股又跌三幾百點，八月期指低水184點，收19,411點，減去除息因素都要低水133點。

大市玩高台跳水，但建行（00939）及中行（03988）意外地倒升收市，市傳月中準備大手配售建行的策略股東美銀美林，可能一筆過將手上建行H股批畀中東基金，消息真假無辦法證實，但睇番八月至今短短九個交易日，建行累積沽空金額接近17億，如果手貨真係唔出街，隨時挾到班淡友失魂落魄。

暑假外遊人數增加，南航（01055）七月搭客量按年增長一成五，載運率升至歷史新高。睇番八月至今恒指唔見近三千點，南航只係回吐1.6%，股價硬淨程度可見一斑，展望國際油價回落，內地航空市場較不受歐美經濟疲弱影響，加埋弱美元下，人民幣升值的幫助，南航短期強勢應該可以延續多一段時間。

積極物色收購機會

伯南克開住架「零息」戰機四圍撒錢，仲話要玩多兩年，弱美元高通脹，揸實港銀每年睇實購買力貶值5至7%，都幾大劑。今日繼續介紹高息系列，第一隻以人民幣結算的證券匯賢產業信託（87001），旗下資產相當簡單，屬內地一級商用物業，北京東方廣場及東方經貿城，兩者上半年出租率分別為100%及99.6%，因為兩者有三十八年的固定使用權，管理層也積極物色新物業收購機會，以25%的負債上限，估計收購規模最大可達110億元。

匯賢全部是人民幣收入及資產，今年四月底以每股5.24元（人民幣．下同）上市，近日大跌市草木皆兵，就連這高防守性房地產信託基金，都掟埋一份，最低見3.81元，昨日收4.29元，較招股價低18.1%。

截至六月底中期業績，每基金單位派0.0403元人民幣，年度化後相當於0.23元，約等於年回報5厘以上。唔少港人賭人民幣升值，日日換2萬大元放入戶口，但基於銀行體系人民幣出路唔多，本地銀行只能畀不足1厘的存款息率，其實有閒置人民幣，匯賢是一條可以財息兼收的出路。