股海實戰：東岳股價反彈可期

呢次全球金融市場大動盪，空軍精心安排一連串負面消息，推冧美股再掟散歐股，總之搞到全球投資人陣腳大亂，依家聯儲局仲講明兩年內唔加息，相信呢班膽生毛嘅空軍會傾盡全力做世界，除非各國政府下決心聯手維穩，否則金融市場難有安樂日子！

港股昨日隨外圍低開，恒指一度低見19,269點，其後跌幅收窄，收報19,595點，跌188點，成交781億元，其中101億元為沽空，沽空比率達到12.9%，而期指則低水184點。淡友明刀明槍，部分國家唔敢怠慢，台灣政府基金已動身入市，南韓禁止沽空三個月，尋日傳來全國社保入場買A股。希望陸續見到各國政府盡快為金融市場輸入正能量，以盡量減低對全球經濟所造成嘅傷害。

中興通訊短線超賣

尋日阿莊提及過嘅中興（00763），股價一如所料再度下試18至20元水平承接，收報18.24元，跌13.76%，唔係身處咁嘅大恐慌時代，難以想像股價會單日有咁大跌幅，好在阿莊已講明觀察低位承接力先至行動，事實上呢隻股短線已經好超賣，加上業務前景唔係想像中咁差，短線18元關承接守得住就可以分注行事。

國務院下令高鐵降速，鐵路股應聲下挫，但受惠客量回流嘅航空股就走高，東航（00670）及南航（01055）同升逾6%。傳聞內地可能調整明年保障房嘅建設目標，中國建材（03323）沽空唔少，畢竟今年以來建材股一直跑贏大市，小心會吸引空軍做嘢！

中期業績預告理想

此外，專門從事製銷製冷劑等產品嘅東岳（00189），股價由七月中9元邊，反覆回落至本周二低位6.14元，累跌近32%，尋日終於來個似樣嘅反彈，高位做7.12元，收報6.98元，升4.3%。

講到東岳，公司將於本月十五日宣布中期業績，但大家唔使驚慌，事關公司早於上月已就中報發出盈喜，預期半年純利係舊年同期純利嘅四倍以上，以去年中期純利2.74億元人仔計，即係話今年中期純利將達到11億元人仔，遠高於去年全年純利7.33億元人仔。

保守假設，集團今年下半年純利僅及得上半年嘅六成，現價計全年預測市盈率約八倍，估值仲可以有幾平呢？難怪呢幾日低位成交甚大，好淡爭持激烈，等要錢唔要貨嘅基金們清倉過後，業績消息又對辦嘅話，股價反彈可期。