魚缸Blogger：大唐新能源 強勢可吼

歐債危機大有火燒連環船之勢，市場更傳法國銀行業唔掂，拖累道指前晚急插近5%，但尋日港股僅跌188點，收報19,595點。不過，希臘五月份失業率升至16.6%，而歐美亦未有實際措施刺激經濟，話唔定大戶又嚟一招欲擒先縱，買咗貨嘅股友宜做好風險管理。

國際金融業前景未明，滙控（00005）尋日再跌近3%，而前日同樣無辜被停賽嘅大新孖寶（02356、00440）就分別急跌近7%同11%。

進軍太陽能業務

大市日升日跌，一旦跟錯邊，隨時左一巴右一巴，所以跟進強勢股較划算。大唐新能源（01798）主要喺內地從事管理同開發風電場，市佔率全國第二，雖然市場憂慮內地風電行業產能過剩，但同時亦令中央加快整合行業，對具有國企背景嘅大唐新能源相當有利，加上集團最近成功進軍太陽能發電業務，而其附屬公司赤峰新能源剛公布嘅中期業績亦令人滿意，可見其盈利前景嘅能見度唔低。

大唐新能源最近喺低位1.25元喘定後，尋日逆市升逾6%，如回試1.35至1.4元可留意吸納機會，目標先睇1.58元，1.25元止蝕。

大唐新能源（01798）

目標價：1.58元 止蝕價：1.25元