股海實戰：中興通訊長短皆宜

美股前晚終於來個似樣嘅反彈，港股順勢高開，恒指最高見過20,105點，誰知一點半開市冇耐大笨象（00005）等多隻股份就突然停牌，阿莊同一眾戰友心慌慌，以為又有咩大動盪，有個別戰友更選擇落車觀望，後來才知原來係港交所（00388）披露易網站出問題。

上晝恒指升632點，其中約112點係由大笨象貢獻，下晝升市冇咗火車頭，個勢自然大打折扣，加上傳來南北韓駁火，故見下晝中移（00941）出埋奶力，升近半成收市，但恒指升幅仍顯著收窄至452點，收報19,783點，成交830億元。

手機業務持續壯大

前兩日大市波幅千幾點，股市運作都冇問題，偏偏反彈市就因為無無謂謂嘅披露系統故障，搞到包括3隻藍籌等股份拉閘，仲未計同時停牌嘅相關衍生工具成交，股民損失、香港金融市場聲譽蒙羞，呢次港交所真係難辭其咎！

回說股市表現，本來上晝股份普遍反彈，但下晝唔少都收窄升幅甚而倒跌。究竟真係冇力彈，抑或只係受突發消息影響，要睇埋今日先至可以下判語。

繼續睇吓啲超低殘嘅實力股，中興通訊（00763）一向係內地龍頭電訊設備供應商，呢幾年業績保持穩定增長，主要受惠於內地3G發展及三網融合帶動行業投資。為應對內地電訊商設備投資度過高峰期嘅影響，近年公司積極拓展手機製造業務，目前已係全球第五大手機生產商。隨着全球智能手機需求不斷上升，相信在一五年前，海外可超越內地成為公司最大嘅市場。

上月初，中興透過香港子公司成功籌集9億美元銀團貸款，反應熱烈，在加大力度拓展海外業務嘅背景下，成功籌措美元貸款亦有助減低匯兌風險。

今年上半年，中興嘅淨利潤同比倒退12%至7.69億元人民幣，主要係毛利率下降3.69個百分點至29.76%，係積極搶攻市佔率之下嘅結果，但見其總收入同比增幅21%，達373.45億元人民幣，只要收入保持增長，產銷上嘅規模效應，可減低毛利率下降嘅影響。

中興股價前日曾亦低見18.1元，尋日收報21.15元，升4.9%，成交3.64億元。現價往績市盈率降至十八倍，估值已回落至吸引嘅水平。若短期市況波動，股價再試18至20元水平承接，長短棍皆宜。