唔少食息一族長揸嘅中銀香港（02388），呢幾日好似「撞邪」，自八月一日見高位23.95元後，連跌七個交易日，本周二曾低見18.9元，乃自去年七月以來低位，即使尋日恒指反彈400幾點，中銀照樣低收，報19.14元，今個月以來累跌17.8%，市值蒸發439億元，亦即係話過去一年上車嘅股民，收息都唔夠輸，大股東中國銀行（03988）持股66%，持貨市值唔見289億元，兩母子真係同病相憐！