第一城嗌高反蝕章

港股連日坐過山車大上大落，九肚限量豪宅地又以粉絲價賣出，對市場殺傷力已經即時浮現，尋日一個私人拍賣會反應非常冷清，好似有間沙田第一城事故單位，雖然開價低過市價兩成，但以依家市況睇，已經無晒吸引力，單位最終無人承價而要收番，劉Sir相信個單位開價最少要低三成先會引起買家興趣。

11物業拍賣僅3成交

劉Sir尋日去咗一個私人拍賣會，發現競投氣氛非常冷清，其中有間沙田第一城嘅事故單位最吸引劉Sir注意，事關呢個單位喺上月中嘅拍賣場上出現過，當時開價248萬，曾經一度承價至298萬，但未到業主個價而收番，今次拎番出嚟，個開價高咗一成三去到280萬，但係最終無人舉手而要再收番，業主今鋪都咪話唔蝕章。

其實市況好，呢類單位一般只要低市價一至兩成就可以甩到手，不過依家撞正冧市，賣地成績又差，個單位開價低唔過市價三、四成都唔使諗啦。

講番尋日拍賣，共有11項物業推出拍賣，最終僅3項新界偏遠地點嘅物業賣咗，由於賣出嘅物業並非城中熱門屋苑，所以無任何指標作用。

同屋苑河景戶高價售

不過，依家呢個環境，優質貨仍然錄得高價成交，沙田第一城15座高層D室全河景單位，面積1,018方呎，設露台及工人房，係屋苑最大戶型，享城門河開揚靚景，成交價688萬，創屋苑九七後新高。

嘉湖交投量少近半

劉Sir同老友香港置業伍創業吹開水，佢話其實上個月二手交投量已經進一步萎縮，好似上個月天水圍嘅嘉湖山莊，只係錄到63宗註冊登記，較六月少四十八個巴仙。

佢仲話，沙田第一城只有51宗成交，亦少咗三十七個巴仙；睇嚟業主想快啲賣樓就要劈深啲先可以爭到買家。