股海實戰：粵海投資穩健可取

亞洲區股市一如所料昨日裂口低開，恒指跌至接近20,000點心理關口觸發技術性反彈，收報20,490點，跌455點，成交999億元。阿莊相信，恒指喺21,000至21,500點阻力甚大，尚持重倉者宜把握反彈市減倉嘅機會，冇貨嘅亦宜盡量減少注碼及短炒頻率，候回落至19,000點水平才認真考慮大注撈底。

查實上周五港股曾挫逾千點，唔少散戶入市撈底，冷不防殺出個美國世紀降級事件，食唔成胡，仲要輸鋪「爆棚」﹗滙控（00005）尋日喺70元關曾現逾千個買牌嘅血肉長城，但眨眼被炸，之後多次再試70元關，已不再見「長城」出現，可見散戶都有心無力！

黃金市場成為全球資金避險之地，黃金ETF逆市上揚，SPDR金ETF（02840）及價值黃金ETF（03081）均升逾3%兼創新高。金礦股方面，招金礦業（01818）上午逆市靠穩，下午見有買盤掃高，收報17.02元，升逾半成，短線有力叩18元關。

股海風雨飄搖，阿莊建議，仍停留喺金魚缸嘅資金，選股宜從幾個要點入手，包括盈利前景維持樂觀，但估值低迷嘅企業；又或係業務經營現金流高，處淨現金狀態，且有良好派息紀錄嘅企業。

東江水盈利有保證

尋日能逆市靠穩嘅股份，不少都有以上所提到嘅特色，例如受惠內地經濟持續發展，帶動淨水需求上升嘅中資水務股，粵海投資（00270）逾半收入及盈利來自供水業務，過去三年經營業務現金流量均逾四十億元，而以向香港售東江水為例，應收帳幾乎沒有風險，派息穩定，過去三年平均派息比率約35%，現價息率有3.3厘。

上月粵投就截至今年六月底止中期業績發出盈喜，預計半年純利將錄得顯著增長，計落全年預測盈利只係單位數字，難怪尋日股價曾逆市搶高至4.55元，收報4.44元，升0.68%，成交9,712萬元。考慮到短期市況仍有波動，建議耐心等候喺4至4.2元水平才考慮，放中線睇4.65元，止蝕位3.65元。