魚缸Blogger：紫金有力追落後

恒指尋日一度向下逼近二萬點大關，但晏晝傳來歐央行買債消息，刺激恒指拗腰反彈，令跌幅減半至455點。恒指連跌多日，短期內現後抽嘅機會唔細，無貨嘅股友酌量博反彈無妨，但仲坐緊嘅宜趁反彈減持。

別人恐慌時貪婪，似乎已經喺尋日出現，金價再創新高，資金已急不及待流入相關股份避險，招金（01818）、靈寶（03330）已率先發難走強，而較落後嘅紫金（02899）亦可以留意。

不斷加強資源儲量

紫金為內地金礦企業龍頭，主要從事黃金冶煉、開採同黃金產品銷售，雖然集團股價早前受旗下銅礦滲漏事件影響，但隨着事件將告一段落，加上集團最近增持澳洲金礦企業股權，充實旗下黃金資源儲量，集團業績亦開始上力，今年首季盈利就按年上升17%至13.94億元人民幣，加上預期年內金價將易升難跌，所以相信由上游開採到下游銷售業務都有從事嘅紫金，應可受惠。

紫金股價尋日雖然偏軟，但其A股股價卻升逾4%，集團今日將會公布業績，當中或有一定嘅啟示性，如守穩3.65元，首站目標4.2元，3.56元止蝕。

紫金礦業（02899）

目標價：4.20元 止蝕價：3.56元