財團插旗之選 九肚地個價唔會差

歐債危機拖累上個禮拜港股瀉近千點，驚魂都未定，呢頭又再跌多幾百點，咁啱政府今日拍賣沙田九肚「限量地」，氣氛就梗有影響；之但係，發展商有咩風浪未見過吖，劉Sir大膽講句，今次賣地成交價一定唔差，點解？若果政府開價保守咗，睇淡後市嘅財團放棄投地，咁其他發展商仲唔趁機喺沙田九肚「插旗」咩！

劉Sir睇咗咁多次政府賣地，經驗話畀我知，環球股市下挫定必影響投地氣氛。但諗深一層，參與投地往往就好似決戰「四方城」一樣捉心理，一日未食胡都唔知對手揸咩牌，有人棄胡就自然係博牌時機啦。今次沙田九肚地皮貴為豪宅地段，點計都算係「大牌」，值得發展商博一鋪，所以成交價一定唔差。

韋堅信測量行老友林晉超都話，外圍經濟不穩，政府對沙田九肚「限量地」開價以至財團嘅部署，都可能同之前有所唔同。再講，呢幅土地樓面多達約103.1萬方呎，足足佔咗同區7幅地皮總和嘅約55%，相信有發展商趁市況回一回，對手減少下「插旗」，雖然唔擔保未來一定投到其餘6幅土地，但真係投地的話，對整個項目定位、銷售及供應都會有明顯優勢。

車位供應少拖低估值

唔講唔知，劉Sir發現，假設呢幅「限量地」應政府要求提供最少970伙，每個單位約1,063方呎，睇番賣地章程資料，每個車位就要由約3.2伙攤分，咁計法，車位總數咪得約300個？林晉超都話，車位供應真係唔多夠，不過佢哋估72.4億元市場下限成交價，已經反映有關情況喎。