市場徐想：亨得利潛在價值吸引
近期，港交所（00388）權益披露咗Swatch持有亨得利（03389）股權由百分之九，一下子增持到兩成，但又唔講做價，主席兼大股東唔知係咪因為「真的假不了，假的真不了」，畀一眾分析員追問下，自爆自己抵押股份畀Swatch，換咗1億美元返來，話用作私人財務安排。
大家都知，大股東抵押股份，肯定係股價敏感消息，連基本嘅企業管治都冇，真陰功。最慘仲係，大股東對現金需求嘅迫切性非常強勁，折讓四成都肯。
講真，今次Swatch肯借錢畀大股東，實在太有意思。Swatch其實由○六年起不斷買緊亨得利，不過，Prof J覺得Swatch應該向「大福先生」好好學習。如果我係Swatch，真係希望大股東冇錢還，一個唔好彩做咗第二大股東，又可拉攏其他基金股東，將亨得利嘅潛在價值完全釋放出來，繼續追蹤永無放鬆。