Fundman睇市：和電香港勢叩3元關

八月一日，美國總統奧巴馬表示，民主及共和兩黨就削赤及提高國債上限達成共識，短期而言，算係好消息，至少美國唔會引發違約災難，不過長遠嚟睇，奧巴馬連番讓步，結果搞到一毫子稅都唔准加，卻要求美國政府達到長遠削赤目標，開源唔得只能節流，政府開支必定要減完再減。

數今年首兩季美國GDP只得0.4%及1.3%，遠低於歷史平均2.5至3%，一旦GDP連政府開支部分都無埋，隨時明年大選前後，搞個雙底衰退出嚟，今次國債上限過到又有咩用。

姑勿論點，股市是英雄地，上星期有「吉士」揸重貨過夜，賭奧巴馬可以擺平共和黨的，終有回報，恒指尋日高見22,808點，升368點，收市升幅收窄到223點，報22,663點。

富士康（02038）老闆郭台銘上周在公司晚會，第一次透露三年內，公司會投資生產線機械人，由目前1萬個增至100萬個，取替人手進行簡單而重複的生產流程。

內地勞工不再廉價

唔難理解，近年員工自殺新聞不絕，富士康管理層多少都有壓力，去年業績蝕2.2億美元，富士康代工王神話開始動搖，加埋人民幣升值、新勞動法及每年上調最低工資的考慮，唔少輕工業經營成本百上加斤，就連專攻高階電子產品的富士富，寧願用機械人取替人手，可見中國輕工業已唔能夠再以平作招徠。

尋日好多業績值得留意，愛股和電香港（00215）受惠於智能手機銷售及數據用量上升，營業額升41%至60.18億元，純利4.94億元，升37%，半年所賺已經等於大行預測全年8.77億元的五成六，短期勢必被大行再調高業績預測及評級，最驚喜仲係和電一如大摩分析員所料，董事會建議派息率回升至75%，粗略計算全年股息回報有望逼近5.5至6厘，股價短期挑戰3元關的機會極高。

業績好過預期的仲有滙控（00005），賺89億美元比分析員預測73億至86億美元高一截。老友去完分析員會議話，滙控業績多得淨利息收入止跌，以及較低實質稅率，但刺激股價最大動力，仲係裁員規模，比早輪策略日透露規模更大，達3萬人，相信滙控可以進一步減省營運成本，一一年市盈率十倍望落好抵買，可惜歐債陰霾揮之不去，要滙控短期再出現高PE唔易，今浪股價上番80至83元已經算有交代。

穩陣收息要揀恒生

相比下，恒生（00011）成績表簡單得多，半年賺80.57億元，升16%，同分析員預測中位數幾乎一模一樣，上半年每股賺4.21元，第二次中期息1.1元（上半年合計兩次共派2.2元）。

恒生資本充足比率，由去年底13.6%升至13.8%，淨息差跌4點子去到1.68%，但貿易融資及企業貸款結餘上升，令淨利息收入升13.8%，乃業績增長的主因。

恒生現價123.6元，預測全年賺167.5億元，市盈率14.1倍，接近○九年中海嘯之後13.8至18.5倍下限，再睇股價120至125元之間橫行近四個月，即使未必因為今次業績帶股價去到130元甚至140元，但短期上升124至128元的機會存在，而股息率有4.3厘，展望下半年淨息差應見底回升，穩穩陣陣買嚟收息都幾唔錯。