魚缸Blogger：中聚電池重返正軌

有時股市同政治都係一樣，一秒都嫌多，美債提限達成協議，尋日恒指即刻有反應，升223點，報22,663點，而獅子錢莊（00005）收市後公布嘅業績省鏡，亦刺激喺倫敦嘅股價一度急升。珠玉在前，今個禮拜將有多隻藍籌公布業績，睇嚟今個八月港股有個好嘅開始。

新廠房陸續投產

雖然中聚電池（00729）股價早前受股東爭拗影響，但隨着事件逐漸明朗化，而集團又喺尋日宣布計劃配股用作業務發展，睇嚟集團已逐步重返正軌。中聚主要從事產銷電池產品，早前同內地大型車企一汽集團合作發展電動車，負責提供電池產品；另一邊廂，「十二五」規劃提倡電動車減排，中聚電池出產嘅電池產品無論喺耐用性或可靠性上都好評如潮，故應可受惠，加上集團繼旗下一間位於吉林嘅廠房喺去年底投產後，新興建嘅二期廠房亦陸續投產，相信集團離盈利復甦嘅日子不遠。

中聚尋日宣布配股後，股價不跌反升，可見市場反應正面，加上誠哥早前亦有增持股份，入貨價亦同現價相近，不妨現價跟進，上望0.66元，穿0.56元止蝕。

中聚電池（00729）

目標價：0.66元 止蝕價：0.56元