股海實戰：新礦資源搭轉順風車

受美債危機拖累，美股上周創一年來最大單周跌幅。美國經濟已病入膏肓，加埋「家衰口不停」，兩黨無視國家利益爭拗不休，一旦「美債違約」成為事實，肯定會喺美國史上留下一大污名。如何面對債權人嘅指罵，帶領政府安度財政危機，將會係奧巴馬在任嘅一大挑戰！

正由於本周初仍受美債危機消息左右，料月初股市會較為波動，下周二內地公布七月份CPI，只要不太過分超出市場預期，相信市況已預早反映消息，加上資金緊張情況有望得到改善，照計八月市況唔悲觀，走勢可能係先低後高。

滙控現價唔值博

上周五恒指跌130點，收報22,440點，期指大低水115點，以反映周末期間美債危機變化。iBond（04208）上周五首天登場，收報106.7元，較面值升6.7%，唔少股友都後悔冇入大飛認購，之不過，呢啲債券產品始終唔係用嚟炒賣，看官別對號入座。

今日收市後大笨象（00005）宣布中期業績，市場預計純利同比增幅介乎23%至29%。不過，美債消息對金融股構成影響，大笨象亦不例外，短期股價主要阻力喺78至80元區域，支持位喺74至75元，現價值博率只屬一般。

上周五本欄推介嘅青蛙王子（01259）彈跳力十足，阿莊晨早以平均價2.72元買入30萬股短炒，隨即掛定2.85元沽出，不料中午前已成功落實，獲利3.24萬元。

新世界系最近又有大動作，新世界中國（00917）旗下的新世界酒店加注美國酒店業，繼六月收購美國一間豪華酒店管理公司後，近日再以5.7億美元購入五間美國豪華酒店，藉以進一步擴大其著名豪華酒店品牌的版圖。彤叔一向無寶不落，頻頻出手，似乎極為睇好美國酒店行業復甦的前景。

大戶收齊貨起錨

講開呢系股份，由新世界發展（00017）及新創建（00659）分拆出嚟嘅新礦資源（01231），上月初掛牌首日見過1.95元後反覆回落，至上月中旬低見1.45元才止跌。

上周初阿莊亦提過呢隻股收貨收得差唔多，可以密切留意映期，上周五果然成功重上「水面」（招股價1.75元），收報1.78元，升4.09%，最重要係成交增至5,643萬元，真係一副開車格！

新礦係河北省最大嘅民營鐵礦營運商，亦都係省內第六大鐵礦營運商，但由於今年初才開始商業生產，故乏往績參考，而招股書預測上半年的綜合盈利約960萬元人民幣，所以買賣呢隻股純粹以「跟炒」的心態出發，反正呢期半新股嘅氣氛唔錯，公司業務與美債危機無關，而股價又剛以大成交重上水面，應該值博，遂以平均價1.73元買入30萬股，目標踢上2元，止蝕位1.65元。

戰報

英皇鐘錶（00887）

Sammi前周五睇好英皇鐘錶，叫人留意，股份果然有料到，股價受盈喜刺激急漲，上周五升至最高位1.73元，較推介日累升逾17%。

青蛙王子（01259）

經紀追蹤作者阿May於上周一叫大家睇實青蛙王子，股價當日報2.48元，不到一周已升至2.88元高位，輕輕鬆鬆又了賺16%。