魚缸Blogger：中國水業睇位入貨

五窮六絕七翻身之說，似乎未有應驗喺港股身上，綜觀整個七月，恒指僅升42點，反彈力度疲弱，同翻身似乎仲有一段距離。雖然好多人認為花旗國嘅債務上限，最終會喺聽晚達成協議，但曾經大得不能倒嘅雷曼兄弟亦一躍而下，黑天鵝再出現並非完全無可能。

回說股市，上周五資金流入公用股避險，煤氣（00003）、兩電（00002及00006）繼續強勢，但筆者始終鍾情國策受惠股。

受惠國策商機龐大

中國水業（01129）主要喺內地從事供水同污水處理業務，目前喺內地有6間供水廠，供水能力達到201.5萬噸，並擁有2間污水處理廠，而「十二五」規劃期間，污水處理更被列為國家三大扶持產業之一，期望喺一五年所有縣城嘅污水處理能力達到100%，當中龐大嘅商機可謂不言而喻。

集團早前曾配股集資4,000萬元，用以還債同營運資金，同時亦表示會透過購併提升供水及污水嘅處理能力，不難想像或有後續動作跟尾。中國水業上周五突破100日線阻力後持續強勢，可待股價回試0.115元附近吸納，上望0.130元，穿0.104元止蝕。

中國水業（01129）

目標價：0.130元 止蝕價：0.104元