魚缸Blogger：中航科工子憑母貴

民主共和兩黨繼續大跳草裙舞，但係時間唔等人，有消息更指本周末美國將會有多個州份面臨破產危機，加上市場對評級機構嘅行動草木皆兵，喺一動不如一靜之下，恒指尋日埋單微跌30點，報22,541點，觀望氣氛濃厚。大市缺乏方向，但新上市嘅高鑫（06808）卻急漲四成，雖然現價市盈率略貴，但概念搭夠，可留意上車機會。

注入行動陸續有來

「十二五」規劃中把航空工業納入國家重點支持發展嘅戰略性產業，並被列為發展高端裝備製造業之首，而未來五年投資額更高達1.5萬億元人民幣，相信對主要生產直升機等航空產品嘅中航科工（02357）最為有利。更重要嘅係，中航自獲母公司中航工業集團點名為集團嘅航空產品製造業務旗鑑後，已先後獲注入多項相關資產，而民航局亦爭取喺一五年全面開放內地嘅低空領域，不難想像中航將會擔當先行者嘅角色。

中航科工尋日喺旗下公司業績理想提振下，一度突破10日及100日線匯集區阻力，可待其回試4.43元附近上車，上望4.9元，跌穿4.35元止蝕。

中航科工（02357）

目標價：4.9元 止蝕價：4.35元