掛牌場面 似足《大時代》

上市前「跣腳」搞到尋日先至掛牌嘅台資公司高鑫零售（06808），太子同大家一樣，都好關心事件會唔會影響佢個股價，話晒佢招股價PE（市盈率）都超過三十倍。

董事保薦人齊嗌「升」

點知尋日上市現場好墟冚，雲集中、港、台三地嘅大行高層，仲畀太子親歷咗一次「大時代」場景。

正當太子同一位內地大律師行嘅靚仔律師傾偈時，剛好就嚟九點半，聯交所上市台前好多人好似倒數咁開始叫囂，原來成班公司董事同幾個保薦人，企在報價屏幕前面等開市，一手揸香檳一手揸拳頭，叫住「升、升、升」，開市第一口就報9蚊，比招股高咗成兩成半。

太子覺得場面似曾相識，但怕呢位內地律師未必知太子講乜，就話：「好像在拍戲」，點知佢居然答：「好似『大時代』」，秋官、劉青雲呢套經典電視劇，原來咁深入民心。

大賣場海報贈港交所

太子仲識咗好多其他賓卡，包括好幾個嚟自台灣百富勤同花旗高層「賓卡」，佢哋都參與咗今次高鑫招股，仲話台灣嗰邊都好多機構投資者會買，唔怪之高鑫首日掛牌咁鬼勁。

仲有一樣令太子意外嘅係高鑫送畀港交所嘅上市紀念禮物，居然係一幅印有高鑫大賣場嘅海報，乘機「hard sell」吓公司。