股海實戰：中國製藥具重組概念

市場喺端午假前經已預測人行加息，結果等到前日始成事實，可見中央保持一貫嘅硬朗作風，推出重大政策從來唔會由外力主導。正當呢期老外都想「做空中國」，也許A股已在醞釀一場翻身戰！

內地加息被視為利好內銀及保險股，加上已消化了淡馬錫減持嘅消息，尋日內銀股普遍回穩，只係農行（01288）沽空仍大，達2.4億元，佔成交31.01%。

本月十六日為農行H股上市一周年，132億股策略股東持股將會解禁，「空軍」擺明想質低正股，再等策略股東批股攞平貨補倉，如意算盤打唔打得響，不妨等着瞧。

金軟身價飆未炒完

半年結前汽車股集體炒上，但救市措施仲未見下文，汽車股轉為個別發展，東風（00489）及長汽（02333）低收，華晨（01114）則升4%。老實講，目前汽車股嘅估值唔算得上便宜，若然想買嚟揸，呢啲位唔建議追貨。

金山軟件（03888）主要股東向騰訊（00700）出售共15.68%股權，總代價8.92億元。成功引入全國最大嘅網絡商入股嘅消息，刺激金軟復牌後股價飛升，曾見5.95元，收報5.45元，升9%，成交6.06億元。

相對於騰訊目前市值逾3,950億元，今次投資金軟唔係咩大數目，但由於金軟喺開發企業及娛樂軟件方面有優勢，策略意義深遠，料可開創雙贏局面，金軟股價未炒完。

成藥業務憧憬分拆

再睇睇隻傳統藥業股──中國製藥（01093），現時已收歸聯想控股旗下，上月中藥股價曾低見3.17元，之後見母公司入市增持，最新持股量為52%。上月底有一基金減持中藥至低於5%，唔排除會進一步減持，不妨留意母公司會否進一步入場增持。

無可否認，目前維C價格尚處下跌周期，面對產能過剩嘅問題，據講全國五大維C供應商將於季內召開會議商討對策。雖然維C業務暫時未能撥開雲霧，但幸好近幾年公司業務發展策略起了重大變化，就係除了繼續做原料藥外，還積極拓展成藥業務，以減少業績受到原料藥周期性變化嘅影響。

從其今年首季度業績可見，維C業務嘅收入及經營溢利分別僅4.91億元及9,072萬元，反觀成藥業務收入已達到7.03億元，經營溢利6,923萬元。正由於公司已成功開拓一門新業務，估值理應可獲得提升，特別係內地成藥市場有可為，相信不出數年，呢瓣業務可發展至具備分拆作獨立上市嘅條件。

中藥現價3.75元，市盈率7.6倍。假設今年盈利按年倒退兩成，現價預測市盈率約十倍，若純睇原料藥業務，估值算昂貴，但計及成藥業務嘅貢獻，則估值算係合理。再講，母公司尚有其他醫藥投資項目，隨着母公司積極準備未來數年實現整體上市，可能會重組醫藥業務，中藥嘅重組概念亦不容忽視。

戰報

TCL多媒體（01070）

Sammi上月二十九日推介TCL多媒體，股價由當日低位2.98元，升至尋日高位3.41元，賺逾一成四。

中航工業（00232）

志強上周三睇中隻中航工業！當日低見0.335元後，逐步升至昨日高位0.37元，累升逾10%。