魚缸Blogger：TCL多媒體升浪未完

尋日恒指高開後走勢反覆，最後僅升12點，但個別板塊表現就榮辱互見，前日兩行被基金配售減持後，三大內銀股尋日浮浮沉沉，無升跌，唯獨隻工行（01398）微升0.17%，而李寧（02331）發盈警後急挫15%，連帶多隻體育用品股都要陪跌3%至6%。

至於家電股，未知係咪有春江鴨聞風先動，多隻股份都有資金追捧。

黑色家電需求龐大

雖然夏季係白色家電嘅銷售旺季，但喺內地人均收入上升、消費水平升級嘅情況下，黑色家電特別係電視機嘅需求亦非常大。TCL多媒體（01070）為內地銷量第一嘅彩電生產商，公司近月動作多多，先有出售旗下TCL王牌套現2億元，隨後又獲母公司注入光電業務，藉以完善液晶顯示電視產品主要零件嘅供應，相信可以有效增加公司嘅競爭力。

如果計埋內地「以舊換新」同「家電下鄉」政策喺今年持續嘅因素，公司今年嘅「錢」景應該唔嘢少，該股近日整固完成後，尋日在成交配合下一度創今年高位3.41元，相信升浪未完，可待股價回試3.3元附近上車，目標先睇3.75元，止蝕位3.1元。