魚缸Blogger：熔盛重工爆發力強
上周四恒指在半年結粉飾窗櫥帶動下，升逾300點，成交返番去700億元樓上。回顧恒指今年上半年同六月份按月分別累跌2.8%同5.43%，但喺歐債危機略為紓緩同內地收緊銀根措施初見成效的情況下，下半年市況亦唔使睇得太淡。今日美國國慶美股休市，但美股上個星期已連升四日，相信今日港股高開機會唔細。
除咗大市氣氛好轉，部分超跌股亦有鹹魚翻生迹象。熔盛重工（01101）在今年一月高位8.35元，隨後六個月幾乎無間斷咁被掟，至近月低位3.8元才見底回升。
受惠十二五規劃
其實集團貴為內地第二大造船企業，所製造超過30萬載重噸的巨型礦砂船佔全球最大市場份額，理應可直接受惠「十二五」規劃把造船列為重點行業的國策，加上集團繼去年純利增長32%至17.18億元人民幣之後，今年頭五個月的定單已達13億美元，幾近集團全年目標30億美元的一半，盈利前景不容忽視。該股受定單理想消息刺激，單日急升近13%，爆發力驚人，料短線整固後反彈可持續，若能守穩4.5元，料有力叩5元關，穿4.2元止蝕。
