股海實戰：德昌處中期上升軌

港股尋日隨外圍高開，惟升勢僅曇花一現，加上A股回軟，恒指一度跌至21,952點，尾市始告回穩，收報22,061點，升20點，成交624億元。值得留意，期指結算前夕，即月及七月期指成交張數分別達到10.3萬及8.2萬張，期指未平倉合約合共高達13.2萬張，乃近年鮮有嘅高水平，可見期指「彩池」愈滾愈大，大撼大誰勝誰負仍有待分曉！

國務院總理出訪歐洲前主動派定心丸，話中國整體物價可控，但奇怪係呢番言論唔選擇喺官方傳媒刊登，反而係喺英國《金融時報》發表文章。外界揣測呢番話係要講畀「老外」聽，叫意圖「做空中國」者咪亂嚟！如今上半年成績幾成定局，假設中央政府一貫講得出做得到嘅作風未變，今年中國經濟可實現增長目標，則下半年經濟情況必會勝過上半年。

再者，阿莊亦唔只一次提及，今年九、十月有特別嘅「九十周年」概念，太平盛世氣氛不可少。就當賭大細，阿莊認為買下半年兩地股市翻生嘅贏面仍然較高。

市場缺乏焦點，繼續睇吓被瘋狂洗倉嘅雨潤（01068），尋日成交達45億元，沽空額4.13億元，收報19.38元，跌5.92%。翻查資料，近年主要有兩家大行持有雨潤股份逾5%，其中德銀喺本月八日申報減持，持股量降至4.8%，再沽亦毋須申報。至於摩通，最後一次申報喺四月二十八日，持有1.63億股（持股量為9%），其中5,942萬股屬可借出股份。

雨潤好戲在後頭

扣除兩家大行持股，以及單一大股東持股量約25%，即係話隻股有大量街貨毋須露面申報。班專業空軍嘅精心策劃大龍鳳，製造「渾水」唱淡之類嘅恐慌傳言，本來不為所動嘅長線基金股東，眼見呢兩日股價急挫反彈乏力，街貨又冇數圍，逼住跟沽，情況與舊年次季比亞迪（01211）被空軍炮轟有點相似，而至今比亞迪業績和股價均不振。至於雨潤，估計班空軍亦有「王牌」喺手，不妨擔定櫈仔等睇戲！

呢期提起民企股都驚驚，轉睇傳統工業股，本月德昌電機（00179）回補了上月底嘅上升裂口位，股價一直穩守喺50日線4.88元樓上，尋日一支大陽燭重上5元，收報5.12元，升逾3%，成交2,983萬元。

公司截至今年三月底止年度業績理想，盈利按年增1.3倍至1.82億美元，突破了○八年度嘅盈利水平，表現令人鼓舞。公司派發末期息每股6港仙，將於七月十一日除淨，相信未來股息率可持續回升。

股息率可望回升

現價往績市盈率十三倍，即使今年缺乏海外客戶大量回補存貨嘅刺激因素，但新產品銷售前景良好，保守假設今年盈利僅單位數字增長，估值亦具支持。股價走勢方面，目前尚處於○九年以來嘅上升軌道，若然一浪高於一浪嘅走勢持續，中期升浪下一目標係突破今年初嘅高位6.14元，惟升軌底部4.6元不容有失。

戰報

恒大地產（03333）

史提芬上周四睇中恒大，以當日低位4.6元計，至昨日高位5.15元，短短數日已累升近12%。

JOYCE（00647）

Sammi果然有眼光，上周四推介嘅JOYCE，當日低位0.96元升至昨日高位1.06元，累積賺逾10%。