銀基賣煙酒搭保健品?
睇得武俠小說多都知道毒藥附近好易會搵到解藥，太子尋日睇到一單幾特別嘅收購，主要係喺內地經銷五糧液、香煙等嘅銀基（00886）出通告，話已同「百年老號」廣州潘高壽訂立意向，公司將向廣州藥業旗下潘高壽收購一間叫天然保健品嘅公司少於50%股權。
收購潘高壽旗下公司
銀基喺通告入面，無詳細解釋收購計劃背後嘅原因，有心水清嘅人就估，銀基或者係想逐步「改邪歸正」，轉行做番啲五花茶、廿四味等保健飲料，實行老少咸宜，但咪話太子小人之心，其實銀基係想嚟個「大小通吃」就真，將五糧液、香煙同啲保健產品擺埋一齊銷售，到時食煙飲酒令到喉乾，飲番兩啖潘高壽嘅川貝枇杷膏，就有咳都唔使怕啦！
銀基將來會賣煙酒又賣保健品。圖為主席梁國興。（資料圖片）