股海實戰：中升身處高增長市場

港股昨日一如預期，隨外圍回吐，可幸跌幅不算太大，恒指收報22,041點，穩守22,000點樓上，成交降至675億元。雖然歐洲債務危機時刻在變，美國QE2月底完結後，美股係咩境況亦冇往績可循，圍繞投資市場不明朗因素仍多，但只要內地股市穩定下來，港股應有喘息空間。

雨潤食品（01068）慘成對沖基金衝擊對象，股價自上周三高位28.6元，反覆回落至尋日低位20.2元，收報20.6元，單日再跌近兩成，成交28.25億元，其中沽空金額為4.93億元，佔成交17.4%，遠低於上周五嘅沽空比率（39.8%），顯示尋日沽盤係「堅沽」﹗

中資食品股宜迴避

誰能料到喺未獲證實任何利淡消息嘅情況下，1隻市值逾五百億元嘅股份，可以喺短短四個交易日內股價被質低近三成！何解呢幾日股價及成交咁唔尋常，執筆時尚未見到公司發出公告作回應。交易所班大帝，係咪被成交低迷嘅港股悶到瞓着晒唔識做嘢？阿莊亦唔想作無謂揣測，只係知道買賣股票唔好靠雙耳，要相信自己雙眼，呢幾日雨潤股價穿晒位，建議投資者點都要忍痛執行止蝕。

眼見雨潤嘅情況，驚覺次季表現一直強於大市嘅中資食品股，原來已成為一班對沖基金嘅獵物﹗為免受「空」軍所傷，呢期沽空比率持續偏高，且大股東持股量少於五成嘅食品股，暫宜避之則吉。

回說市況，近周港股挾淡倉，有超過廿隻恒指熊證被強制收回，再睇嚟緊收回價喺22,500及22,700點嘅恒指熊證，街貨數目都唔少，不能完全排除大戶會喺長假期前繼續屠「熊」，順便做埋半年結粉飾窗櫥活動嘅可能性。

阿莊就聽聞，近期水泥股大發神威，就係因為唔少基金都手持重倉，故務必要喺半年結前托住個價，等半年結份成績表好睇啲。持貨短炒，長假前有好位可考慮先獲利回吐袋袋平安，等長假過後再作部署。

汽車股逆市有睇頭

上周表現唔錯嘅汽車股，尋日個別發展，較亮麗嘅有比亞迪（01211），逆市升5.4%，另廣汽（02238）及東風（00489）亦輕微高收作結。從事汽車銷售及服務嘅中升控股（00881）股價亦有睇頭，尋日收報16.2元，逆市升3.5%，成交8,543萬元。

近幾個月中升股價營造出大圓底，五月中旬股價重上50日線後，至今仍穩守其上，近兩日大陽燭有成交配合。事實上，過去兩年內地汽車銷售強勁，並帶來一個龐大嘅汽車售後服務市場，中升主力經營全國性4S汽車經銷業務，身處高增長市場，若用心經營，前景確有可為。

純睇走勢，中升股價近日正逐步轉強，下站目標係回補今年一月中旬嘅下跌裂口頂部17.26元，若能成功突破，目標可上移至18元，至於50日線14.9元則不容有失。

戰報

東岳集團（00189）

東岳近日見底回升，錢進上周四已作推介，以當日低位7.35元計，至昨日高位8.33元，賺逾13%。

南方航空（01055）

南航股價做好，Sammi上周二已睇中，由當日低位3.83元計，至昨日高位4.35元，同樣有逾13%進帳。