太子手記：新地高層上網講心事
新鴻基地產（00016）網站大搞新意思，既有新面貌、又有新內容，最特別嘅係網站內新增咗「新地Xtra」嘅欄目，畀新地中、港兩地各部門同事合力撰寫網上專欄，分享佢哋喺業務、工作及生活點滴。
尋日新地代理執行董事雷霆喺專欄內，同大家分享對樓市及瓏璽開售嘅感想，遲啲兩位郭生（副主席郭炳江及郭炳聯）都可能會透過專欄同大家分享文章。
雷霆撰文談瓏璽
雷霆喺專欄裏面話，雖然最近新做樓按利率略加，但仍處極低水平，但經濟強勁、市民收入增加、租金上升、通脹已突破5%（今年底仲可能超過7%），好多人相信物業係最佳保值方法。
佢仲話好多買家等瓏璽開售等咗好耐，但相信佢哋睇完示範單位之後，必定會話「等待是值得的！」
除了雷霆外，新地代理租務總經理馮秀炎及鍾秀蓮、新地執董兼首席財務總監陳國威、天際100總經理徐綺蓮等，都喺專欄度撰文。