市場徐想：阿里巴巴任務完成
講到互聯網，阿里巴巴集團主席馬雲近期將手上王牌——淘寶網一拆三，以C2C嘅淘寶網，B2C嘅淘寶商城加上搜尋器一淘網。阿媽以集團形式上市，阿仔就各自跑數，邊個跑得好，又可以分拆再上市，幾正。好過一次過打包上，價都平咗一截。
近年，上淘寶買嘢嘅人，不計其數，最高峰有成八成佔有率，咁大個餅，又有邊個唔想食？你見到當當網，國美（00493）都開始搞網購，競爭激烈，唔做定前期工夫準備喺市場吸水，點樣繼續「一統山河」呢？講真十年前B2C個個都話燒錢，到依家B2C又好、C2C又好，有中國億萬網民粉絲頂住，點會畀唔到無限嘅幻想畀大家呢？係咪？
至於阿里巴巴（01688），喺B2B中已經完成咗歷史任務，加上近年管治問題「餘震未了」，都係唔好玩呢隻股住。