股海實戰：海爾電器具私有化誘因

港股先升後跌，頹勢未改。恒指高開75點，見21,770點後，一度升至全日高位21,897點，惟高位承接始終不足，淡友反手藉政府「復建居屋」傳聞打沉地主股，加上人行近次調高RRR昨日生效，Shibor飆升，A股跌勢未止，結果恒指收市報21,599點，跌95點，成交660億元。雖然即月期指轉高水23點，但睇落月底結算前好淡必有一番爭持，淡友仍佔上風，加上外圍因素變化冇得估，都係少做少錯為妙。

京官南來打了個轉，結果「葡撻」勝「蛋撻」，特區政府終於知衰，話會認真復建居屋以回應市民置業訴求，三大地主股新地（00016）、恒地（00012）及長實（00001）跌幅介乎1.9至3.8%。查實復建居屋只要掌握好供應量，對私樓市場及樓價衝擊未必如大家想像般大。事實上，近兩年私樓購買力主要來自內地同胞，少咗本地基層參與不會有太大影響，反而一旦內地投資者要沽港樓提款，先至係大大鑊！

新股翔宇疏浚（00871）首日掛牌，股價曾低見2.44元，收報2.45元，較招股價低23%，成交7,983萬元。呢隻新股經已用下限定價，獨家保薦人又係大摩，首日掛牌表現都咁差，可見IPO真係幾難做。

汽車股逆市回穩

上周五見到今輪大跌市最先被洗倉嘅保利協鑫（03800）開始大反彈，反而強勢股聯通（00762）同騰訊（00700）就捱沽，呢種強弱勢股互相走位玩「搖搖板」遊戲嘅現象似在蔓延，尋日輪到雨潤食品（01068）被插，股價急挫5.1%。至於逆市回穩嘅就有汽車股，廣汽（02238）、東風（00489）及吉利汽車（00175），升幅介乎1至3.6%。

阿莊認為，呢個係跌市近尾聲嘅現象，但好多時大跌市嘅底部係喺極不理性嘅情況下所產生，所以都無謂去估邊個位係底。

提到保利協鑫，大股東入場增持對股價起支持作用。事實上，近期不論本地抑或中資股，股價跌得過殘，大股東有銀，都忍唔住手入場增持，好似尋日睇SDI，四叔繼續增持恒地，另上實（00363）及世房（00813）均獲大股東增持。

講開增持，持有海爾電器（01169）51.22%股權嘅A股公司青島海爾，上周三召開董事會通過向最終母公司海爾集團收購十家公司（仍有待股東會通過），另通過於未來一年內視乎情況增持海爾電器股份嘅議案，但強調喺可見未來沒有私有化海爾電器嘅計劃。

系內重組留伏線

控股公司表明增持意向，對海爾電器股價起到支持作用。近年內地白色家電競爭十分激烈，海爾電器憑着擁有全國知名嘅品牌，以及喺研發同產銷能力方面嘅優勢，算係一隻相對優勝嘅內地家電股。

再講，雖然目前海爾電器未具被私有化嘅條件，但長遠計誘因依然存在，事關母公司既已選定A股公司青島海爾作為整合資產嘅平台，未來如何善用海爾電器呢個香港融資平台，係遲早要面對嘅問題，這亦為日後系內進一步重組留下伏線。

戰報

神冠控股（00829）

神冠逆市呈強，尋日高位見5.95元，積奇早於本月三日已作推介，以當日低位5.48元計，已賺近9%。

+9%

水務地產（02349）

錢進上周二睇中嘅水務地產，尋日高見0.109元，以推介日低位0.099元計，短炒已可賺逾一成。

+10%