太子手記：港交所賀壽摩笛贈興
港交所（00388）已上市十一年，今日傍晚就會搞酒會賀吓。今年對港交所嚟講，都算係多姿多采，除咗推出首隻以人民幣計價嘅產品外，仲有外國名牌輪流港上市。
目標價削至120元
不過，幾家外資大行就似乎唔係幾畀面，繼高盛唱淡港交所股價後，大摩都唔執輸「贈興一番」，仲將目標價大幅削至120元，評級為「跑輸大市」。
大摩話，港股交投去年都仲有800至900億元，但今年成交金額縮至740億元，上個月仲跌到落650億元，影響港交所嘅交易費用收入，估計今明兩年大市成交分別跌至750億元同800億元。
大摩估，除咗因為交易類收入只得單位數增長外，投資類收益都會因為利率處於低位而冇乜起色。港交所推出人民幣產品後，成本升幅或超過預期。